Cynllun Pensiwn Dur Prydain – ein dull o orfodi

Mae pensiynau â buddion wedi’u diffinio (DB) yn cynnig incwm ymddeol gwarantedig. Mae’n ofynnol i bobl sydd am drosglwyddo allan o bensiwn o’r fath gael cyngor os yw’r pot yn werth mwy na £30k, er mwyn sicrhau bod hyn er eu budd nhw. Maent yn dibynnu ar gael cyngor o ansawdd uchel sy’n eu galluogi i wneud penderfyniad gwybodus.

Roedd Cynllun Pensiwn Dur Prydain (BSPS) yn arfer bod yn Gynllun Pensiwn DB. Trosglwyddodd tua 8,000 o bobl allan o’r BSPS, ac mae ein tystiolaeth[1] yn awgrymu bod bron i hanner (46%) wedi gwneud hynny ar ôl derbyn cyngor anaddas.

Rydym wedi cynnal tua 30 o ymchwiliadau i gwmnïau ac unigolion ynghylch cyngor trosglwyddo DB sy’n ymwneud â BSPS. Mae’r ymchwiliadau bellach wedi’u cwblhau, ac rydym yn gweithio i ddod i benderfyniadau terfynol ar ba gosbau sy’n briodol lle rydym wedi canfod camymddwyn. 

Gwneud iawn am gyngor BSPS anaddas

Ochr yn ochr â’n hachosion gorfodi, rydym wedi bod yn sicrhau bod cyn-aelodau BSPS yn gallu cael iawndal am gyngor anaddas.

Mae dros 6,500 o gyn-aelodau wedi cael cefnogaeth gan Wasanaeth yr Ombwdsmon Ariannol (FOS), Cynllun Iawndal Gwasanaethau Ariannol[2] (FSCS) neu drwy gynllun unioni’r FCA. Mae £106m o iawndal bellach wedi’i gynnig i gyn-aelodau BSPS i’w rhoi yn ôl yn y sefyllfa y byddent wedi bod ar eu hymddeoliad. Mae rhagor o wybodaeth ar gael yma[3] ar ein camau gweithredu ar y cyd i helpu cyn-aelodau BSPS i gael yr ymddeoliad y buont yn gweithio ar ei gyfer.

Rydym hefyd wedi gweithredu lle mae cwmnïau wedi ceisio osgoi eu rhwymedigaethau a gwneud cynigion iawndal camarweiniol i ddefnyddwyr.

Ein dull o orfodi

Rydym wedi, ac yn parhau i gymryd camau gorfodi, lle mae tystiolaeth o gamymddwyn difrifol.

Rydym wedi gweld 2 prif fath o gamymddwyn mewn achosion BSPS:

• Yn y rhan fwyaf o achosion, mae cwmnïau neu unigolion wedi torri’r egwyddor bod rhaid iddynt gynnal eu busnes gyda “sgil dyladwy, gofal a diwydrwydd”. Mae hyn yn golygu bod cynghorwyr wedi dangos diffyg cymhwysedd yn sylweddol gyda’u cyngor.
• Mewn achosion mwy difrifol, mae cwmnïau neu gynghorwyr wedi torri’r egwyddor bod yn rhaid iddynt gynnal eu busnes “gyda gonestrwydd”. Mae hyn yn golygu eu bod wedi bod yn ddi-hid neu’n anonest yn y modd maent wedi delio â defnyddwyr a/neu’r FCA.

Mae’r camau gweithredol y gallwn eu cymryd yn cynnwys:

• ceryddu cyhoeddus
• cosbau ariannol
• gwahardd cynghorwyr anaddas
• cefnogi ymdrechion unioni ehangach

Mae pob un o'r ymchwiliadau'n gymhleth ac yn cynnwys dadansoddi nifer sylweddol o dystiolaeth, cyfweliadau gyda tystion allweddol ac adolygiadau o ffeiliau cwsmeriaid. Fe wnaethom ddatblygu teclyn (y DBAAT[4]) i asesu addasrwydd y cyngor a ddarperir gan gwmnïau ac unigolion.

Camau gorfodi sydd wedi’u cwblhau

Mae’r tabl yma’n rhestru’r camau gorfodi sydd wedi’u nodi hyd yma a bydd yn cael ei ddiweddaru wrth i ni barhau â’n gwaith.

Efallai y bydd iawndal yn daladwy i ddefnyddwyr a bydd yn rhaid i’r FSCS ei dalu. Rydym wedi cymryd camau i sicrhau'r unioni mwyaf posibl sydd ar gael drwy sicrhau, lle bo'n briodol, fod y bobl yr ydym yn cymryd camau yn eu herbyn yn talu arian yn uniongyrchol i'r FSCS. Bydd hyn yn ysgafnhau'r galw ar yr FSCS ac yn sicrhau bod y partïon sy'n gyfrifol am y camymddwyn yn talu iawndal.